Norsk Hydro : Hydro sitt resirkuleringsanlegg i Høyanger opna av finansministeren

Med det nye anlegget aukar Hydro resirkuleringskapasiteten i Noreg og svarar på den veksande etterspurnaden etter aluminium med lågt klimafotavtrykk. Resirkulering av aluminium treng berre fem prosent av energien som blir nytta i elektrolyseproduksjon av aluminium.

- Utsiktene i aluminiummarknaden er gode i eit Europa som skal gjennom det grøne skiftet, men i ei uroleg tid treng kundane føreseielege partnarar for dei grøne satsingane sine. Med denne investeringa viser Hydro at vi satsar på Høyanger som ein stabil leverandør av lågkarbonaluminium i tiåra som kjem. Det er viktig for Hydro, for Høyanger og for verda, seier konserndirektør Eivind Kallevik i forretningsområdet Aluminium Metall.

I resirkuleringsanlegget vert aluminiumskrap, som har vore i bruk i alt frå bilar og bygningsfasadar til møblar og emballasje, smelta om til bruk i den vidare aluminiumproduksjonen til Hydro. Resirkulert aluminium bidreg til eit lågt CO2-fotavtrykk i aluminium, som gjer at kundane får lågare utslepp i verdikjeda og kan nå klimamåla sine. Anlegget er det første av denne typen i Noreg, med kapasitet til å resirkulere om lag 36 000 tonn brukt aluminium i året.

5A ved Høyanger skole vant førstepremie for kreativt design under konkurransen "Aksjon Gjenvinning" i 2023. I dag var de selvsagte gjester under åpningen av Høyanger Recycling. (Foto: Jens Christian Boysen/Hydro) Hydro investerer i framtida til Høyanger

Under den offisielle opninga klipte finansminister Trygve Slagsvold Vedum snora til eit anlegg som har skapt 21 nye årsverk hos hjørnesteinsbedrifta i Høyanger. Resirkuleringssenteret til 240 millionar er ei langsiktig investering som bidreg til å tryggje sysselsetjing og verdiskaping i samsvar med Hydro sine ambisjonar om grøn industriutvikling i Noreg. Samstundes er verket avhengig av tilgang på kvalifisert arbeidskraft for å halde hjula i gang.

- Hydro Høyanger er eit godt døme på kva ein kan få til i ei lita bygd berre ein har trygge rammevilkår, kompetanse og nok fornybar kraft. Verket er ein framtidsretta arbeidsplass som skal bidra til livskraft i lokalsamfunnet i tiåra som kjem, men det krevjer óg at vi har dei folka vi treng for framtida. Difor er me mellom anna svært opptekne av å halde oppe utdanningstilbodet til den videregåande skulen i Høyanger. Det er den viktigaste kjelda til lærlingar for verket, seier fabrikksjef Ann Synnøve Øygård.

• Innan 2050 skal Hydro bli eit klimanøytralt selskap som lagar klimanøytrale produkt for eit klimanøytralt samfunn. Gjennom satsing på ny teknologi og auka resirkulering skal selskapet nå målet om å kutte eigne klimautslepp med ti prosent innan 2025 og 30 prosent innan 2030 samanlikna med 2018-nivå.
• Full avkarbonisering skal nåast ved å resirkulere meir brukt aluminium i kombinasjon med at ny teknologi blir teken i bruk. Dette inkluderer karbonfangst og -lagring, bruk av hydrogen og biogass som energikjelde og dessutan ny, eigenutvikla teknologi som har potensial til å eliminere klimautslepp frå produksjon av primæraluminium.
• Ved å kombinere vasskraft som energikjelde, moderne produksjonsteknologi og resirkulering av skrap kan Hydro Årdal levere Hydro REDUXA 3.0 med eit karbonfotavtrykk på under 3 kg CO2 per kg aluminium. Det er om lag 80 prosent lågare enn det globale gjennomsnittet.

Finn ut meir om Hydros vegkart for nullutsleppsproduksjon av aluminium.

Publisert: 19. april 2024

Relaterte sider

Kontakt

Abonner på nyheter og pressemeldinger fra Hydro